NA DONHAR HLAH!

                           

Expository Sermon

 Matthew 6:25-34

25“Cuti a si ruangah ka lo sim: nan nunnak hrangih nan ṭulmi ti le rawl le nan ruangpi hrangih hnipuan pawl thu ruat le donhar in um hlah uh. Thungai ih ti ahcun, nunnak hi rawl hnakin a thupi sawn lo maw? Hnipuan hnak khal in taksa ruangpi hi a thupi sawn lo maw? 26Van ih a zuangmi vate khi zohhnik uh; annih in thlaici an tuh lo, rawl khal an khawm lo ih cuam sung khalah an khawl lo. Asinain vancungih a ummi nan Pa in a cawm thluh a si. Vate hnakin tampi nan sunglawi sawn a si lo maw? 27Nan donhar ruangah nan nunnak caan tawite tal nan sauter thei maw?

Introduction

Khrih sungah ka duhdawt zet mi ka u le nau pawl ziangah maw na don a har ding, na hrangah ziangkim tuanvo a lo lak sak ringring tu a um ti ah na ruat dah lo maw! Leitlun na um sungih tulmi thil tla cu amah ih kutsuak lawngte a si kha. Taksa hrangih na tulmi thil pawl ruat in donhar le vansang zet in na um pang maw? Na um pang a silen thazang lo pek ka duh a si, cumi cu na hna sungah fiangzet in na thei leuhleuh mi thu a si. Na donharnak in a lo luatter thei tu cu sumpai tampi neih mi ah a si lo, ziangkim a tuahtu le a thei theh tu a nung Pathian na nei ngah ih Amah na rinsan ngam phawt cun cuih na donharnak pawl ih sin na luat thei ding a si.

I. Na Nunnak Hrangah Na Donhar Hlah! (vv-25-27)

        A. Nunnak hi ti, rawl le hruk ding hnipuan hnak in a thupi sawn (v-25)

        B. Kan Pain vate si seh, tlangak note si seh, ramsa pawl hmuahhmuah a cawm theh-

               (v-26;Psa.147:9).

        C. Dondar ih na um ruangah thiltha a suak lo, Na nun tawite tal na sauter thei lo (v-27)

        

[Kan nunnak hi ti le rawl hnak in a thu pi sawn in rak ti fawn si, nan nunnak hrangah na donhar hlah in ti. A san cu Bawipa in amah hmuihmel kengih tuah mi kan si ih amah in kan hmailam hrangah timtuahnak tha a nei cia tinak a si. A kutsuak ramsa phun kim a cawm a si ahcun kan nih a faate pawl cu in cawm ringring ding ti kha a fiang ngaingai. Kan damsung nun hi a tawi tuk ruangah donhar in um ding in siang lo ih a pek mi nunnak kha thupi zet ih ret thiam dingah in zirh mi a si].  

II. Sinfen That Na Neih Lo Ruangah Na Donhar Hlah! (vv-28-30)

        A. Pangpar hnen in kan zir a tul (v-28)
        B. Siangpahrang Solomon  ih lennak le a hnipuan hman in Pangpar ih mawinak a tluk lo a ti (v-29)

        C. Cuih pangpar pawl hnak in nan sungawi sawn (v-30)

[Kei mah ihsin thok in kan ruatzet theu mi thil pakhat a si ve mi cu hruh ding hnipuan tha nei thei sehla tiin donhar zet in kan um theu ih midang pawl ih hruh mi hnipuan tha pawl kan daw zet theu a si lo sawm? Asinan Pathian in hitin a sim, "tuih sun ah a um nain thai sun ahcun a um nawn lo mi hramlak hrampi a thuamtu Pathian a si, Nan nih tla cu a lo thuam sinsin lo ding maw" ti ah in ti. Curuangah kan donharnak pawl hmuahhmuah Amah hnenah thum in kan nunnak ah thilmak in ra tuahsak ding ruahsannak thawn zumnak nung nei ding kan si].

III. Ei le In Hrangah Na Donhar Hlah!(vv-31-34)
        A. Ei le in hrangah na dorhar hlah (v-31)

        B. Hmai lam hrang thu lawng ruat in Donhar in um hlah!(v-34)
        C. Bawipa in na tulsam mi a thei (v-32)
        D. A Ram le a Felnak hawl hmaisa (v-33)

[A ram le a felnak hawl hmasa ding ti can cu: Amah duhdawt, Amah thawn pehzom awknak nei, Midang va duhdawt ti a si ih, A felnak ti can cu: Pathian ih mithmuh ah a dik, a mawi mi le a daan pek mi thawn a mil aw mi tuah si lole a thuthlunnak hi a si. Innsang nuam din na duh maw? Na duh a si ahcun Bawipa hnenah thlacam aw innsang nuam a lo pe ding. Mi hlawhtling si na duh maw? Bawipai hnenah na tumtah mi pawl rak sim aw, hlawhtlinnak a lo pe ding. Ziangahtile kan tulsam mi hmuahhmuah a thei thluh le in pe thei tu cu Bawipa lawng hi a si. Saam hlabu Saam 37:4,  sung ahcu "Bawipa ah na lungawinak hawl awla, na lungthlitum a lo pe ding" ti ah in ti. A thupi bik ih kan ret ding mi cu kan ei le in a silo, kan neih mi pawl an silo. A ram le  a felnak hawl hmaisa ding hi in duh a si, thil dang hmuahhmuah cu amah in in tuahsak ding/ in pe ding/ in cawm ding/ in thuam thluh ding a si ti ah Bawipa in in sim].

Nun ih kan zir dingmi pawl
***************************
- Nitin kan nunnak ah Pathian a pakhatnak ih ret ding.

- Kan hnen ih a thukam mi pawl zum le a dung thluntu tha si ding.

- Kan biak mi Pathian cu a thukam a pelhsolh dah lo ih zum a tlak mi a si.

- Kan tulsam mi pawl hmuahhmuah in thei sak theh tu Pathian a si.

- Donhar le vansang in um ding kan si lo, kan Pathian cu a rintlak ih kan tulsam mi hmuahhmuah in pe thei tu a si.